“Azərbaycanın Qarabağ bölgəsində yaşayan ermənilər hər hansı digər Azərbaycan vətəndaşı qədər bərabər hüquq və təhlükəsizlik zəmanətinə malik olacaqlar”. Bu sözləri Azərbaycan Prezidenti İlham Əliyev iyunun 20-də Çinin “China Media Group” media korporasiyasına müsahibəsində deyib. Sitat: “Həmçinin əlavə etmək istəyirəm, Azərbaycandakı erməni azlığına gəldikdə, biz artıq rəsmən bəyan etmişik ki, onların hüquqları və təhlükəsizliyi Azərbaycan Konstitusiyası əsasında lazımınca qorunacaq. Bununla belə, Azərbaycan onlarla etnik qrupun, o cümlədən ermənilərin yaşadığı ölkədir. Bizim dini və ya etnik zəmində heç zaman hər hansı problemimiz olmayıb. Buna görə, Azərbaycanın Qarabağ bölgəsində yaşayan ermənilər hər hansı digər Azərbaycan vətəndaşı qədər bərabər hüquq və təhlükəsizlik zəmanətinə malik olacaqlar. Düşünürəm ki, bu, tam şəkildə beynəlxalq hüququn normalarına uyğundur və fikrimcə, Azərbaycanın bu mövqeyi beynəlxalq ictimaiyyət tərəfindən dəyərləndirilir”.
Bəli, Azərbaycan 1828-ci ildə İran və Türkiyədən Qarabağa köçürülmüş ermənilərə həmişə qucaq açıb, qonaq kimi qayğı göstərib. Amma nankorlar sonradan burada özlərinə dövlət qurmaq arzusuna düşdülər… Və 90-cı illərdən xarici dəstəkçilərinin hesabına torpaqlarımızı işğal edib qondarma dövlət qurmaq istədilər. Amma Azərbaycan ordusu 2020-ci ildə separatçıların işğal niyyətinin üzərinə qara xətt çəkdi.
Bu gün Qarabağ erməniləri Azərbaycan bayrağı və qanunları altında yaşaya bilər. Amma birdəfəlik bilməlidirlər ki, bu yurdda ikinci erməni dövləti heç vaxt qurula bilməz. Əgər ikinci erməni dövləti yaratmaq istəyirlərsə, buyursunlar, Fransada, Rusiyada, Livanda, İranda… o qədər boş ərazilər var ki…
Asif MƏRZİLIİ