28 mart 2023-cü il tarixdə, saat 21:51-də Azərbaycan Respublikası Milli Məclisinin deputatı Mustafa Fazil Qəzənfər oğluna yaşadığı evin qarşısında- Bakı şəhəri, Sabunçu rayonu, Zabrat-1 qəsəbəsi, Babək küçəsi ev 2 “Z” ünvanında “Kalaşnikov” konstruksiyalı avtomat silahından atəş açılaraq terror aktı törədilib.
Azərbaycan Respublikasının Dövlət Təhlükəsizliyi Xidmətinin (DTX) rəsmi saytı məlumat yayıb ki, terror aktı nəticəsində Fazil Mustafa bədənin sağ çiyin qurşağını və sağ budun aşağı üçdə birini dəlib keçən güllə yarası almışdır. Ona zəruri tibbi xidmətlər göstərilir və vəziyyəti stabil olaraq qiymətləndirilir. Həyati təhlükəsi yoxdur. Sitat: “Faktla bağlı Azərbaycan Respublikası Dövlət Təhlükəsizliyi Xidmətinin İstintaq baş idarəsində Cinayət Məcəlləsinin 277 (dövlət xadiminin və ya ictimai xadimin xidməti və ya siyasi fəaliyyətinə son qoymaq və ya bu fəaliyyətə görə qisas almaq məqsədilə onun həyatına sui-qəsd etmə) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini, döyüş sursatı əldə etmə, saxlama, daşıma və gəzdirmə) maddələri ilə cinayət işi başlanılıb. Terror aktını törətmiş şəxsin və cinayət hadisəsi ilə əlaqəsi olan digər şəxslərin müəyyən olunaraq cinayət məsuliyyətinə cəlb olunması istiqamətində kompleks təxirəsalınmaz əməliyyat-istintaq tədbirləri həyata keçirilir. İctimaiyyətə əlavə məlumat veriləcəkdir”.
***
Azərbaycan Respublikasının Prezidenti İlham Əliyevin və birinci xanım Mehriban Əliyevanın tapşırığına əsasən, Prezidentin köməkçisi Anar Ələkbərov martın 28-də yaşadığı evin qarşısında terror aktına məruz qalmış Milli Məclisin deputatı Fazil Mustafanı müalicə olunduğu xəstəxanada ziyarət edib, onun ailə üzvləri ilə görüşüb. Millət vəkilinə dövlət başçısının və birinci xanımın şəfa diləklərini çatdıran Anar Ələkbərov bildirib ki, Prezident İlham Əliyev onun tezliklə sağalması üçün tibb personalı tərəfindən bütün zəruri tədbirlərin görülməsi ilə bağlı müvafiq tapşırıqlarını verib. Diqqətə çatdırılıb ki, xain terror aktını törətmiş şəxsin və ya şəxslərin müəyyən edilərək cinayət məsuliyyətinə cəlb olunması istiqamətində təxirəsalınmaz əməliyyat-istintaq tədbirlərinin aparılması ilə bağlı Prezident İlham Əliyev tərəfindən hüquq-mühafizə orqanlarına göstəriş verilib.
***
Bu arada İİKK-nin (İslam İnqilabı Keşikçiləri Korupusu) teleqram kanalı 28 mart saat 23.08-də belə bir maraqlı, həm də suçu ortaya qoyan məlumat yayıb: “Anti-İran və anti-İslam bəyanatları ilə tanınan Azərbaycan parlamentinin üzvü Fazil Qəzənfəroğlu (Mustafa) öldürülüb”.
Bu məlumat internetdə millət vəkilinə edilən sui-qəsddən yarım saat sonra yayılıb. Hansı ki, Azərbaycan KİV-ləri və bir çox dövlət orqanları hələ bu barədə bilmirdilər. Həmin vaxt F.Mustafanın vəziyyəti haqqında da heç nə məlum deyildi. Bütün bunlar İran xüsusi xidmət orqanlarının və İran casuslarının bu sui-qəsddə əli olmasının dolayı dəlilidir. Bu məlumatda Azərbaycanlı deputata verilən xarakteristika da öz sözünü deyir. Bununla da Fazil Mustafaya qarşı terrorda xoruzun, daha doğrusu, İranın “quyruğu” göründü. Artıq hər şey göz önündə və ortadadır. Daha dəqiqi, qaradan başqa rəng varmı?!
Asif MƏRZİLİ